صياد النعامة يلقاها يلقاها
الاولى آها
والثانية آها
والثالثة آها ،
اللَّوْلى آها على اللي هزت بنتو السيف وما خلاَّها ،
وﭭال ليها صبري
حتى تجي النقرة فين يغبر نحاسك
وعرات صدرها للريح
راكبة عود وملجماه بسبيبو ،
وسالفها اداوه ، ما جابو ما خلاّها تجيبو .
والثانية آها على اللي زرع الزارع غلتو
ومن عينو دار ساﭭية وسقاها ،
وﭭلبو حطو وسط الدرسة ودرّاها
وجا هو وجمع الحصيصة وادّاها .
والثالثة آها على اللي ﭭال كلمتو وما وْفاها
ونغّصنا ويتّمنا وابَّاتنا حيّين :
البو حط ﭭصعتو وما كلاها
تفكر وليداتو : شي في ذاك البر ملاوح ،
شي مطرقين عليه
شي في الزناقي سارح .
آها .. آها .. آها وميات آها
على بلادي توجعت لا من سقاها.
إيلا كان شي ﭭيد في رجلي
راهو بلادي ،
ويلا كان شي تاج على راسي
را هو بلادي .
بلادي حالتك حالة
وليتي يتيمة وهجالة
ازمانك ما خلاو فيه رباح
آح . آح .. كلشي يجري ويـﭭول آح
العاقل داير وتيّر ولَّى مدّاح
والفقيه داير مضمة ولَّى شطّاح
والشريفة خدامة في الملاّح
والسلوﭭي ولّى نباح
واللي نتسناو بركتو ولّى ذبّاح
والشريحة زادت سومها سوم التفاح
ويلا ﭭلنا حقنا فين ؟
يـﭭولو بَّاح
زمانك يا بلادي زمان العجايب
مزوقينك كيف الطعريجة
واللي هضر يـﭭولو عليه سايب
فيك النحل هجوه من الزرايب
والشايب مخدمينو للبيعة والغرايب
دايع كيف الشيح
كاسر ودنو للريح
التسبيح في العنق عربون المسلم
حطو ليه الدواية حطو ليه القلم
وزيدوه يـﭭول كلمة حق
والله ما يـﭭول غير اللي تعلّم
يغمض عينيه ويسد وذنيه ويزم
ما شاف ما سمع ما تكلم .

بعض الناس كالزَّواق
ها الشعارات ها النفاق
بلادي ولات قيسارية
تيفصلو فيها الوطنية
في السفارات كيـﭭليزيو الشرَكية
البايرة اللي بغات تدور بحالتها
تسلف قميجة وتـﭭول هالشرَكية
بلادي بلاد الطاسة والسيبة
بلاد المواسم وهزان البوط
بلادي مزنة غامقة ما عرفنا آش جايبة
بلادي بلاد التيرسي والزفوط
بلادي واد حامل مستور
بلادي دحيّش قصيور محـﭭور
بلادي شاهدين فيها بالزور .
بلادي يا لكويفرة عرّي على غنبورك
يا السندافة يالعاطية خيرك لغيرك
بلادي بلاد العمامة والهنكارة
بلاد الكمية والشكارة
بلاد البرارك والقصور يا خسارة
بلاد القواويد والسمسارة
بلاد الألبة والهومارة
بلادي محدودة بالبحر والبحر اهبيل
بلادي عطشانة وما البحر قليل
بلادي عزيبة مدحية في الغابة بالليل
بلادي حمامة تنوح على فراق الخليل